A Politische Partei is a Gruppm vo Leid, de wås gleiche oda ähnliche politische Züle håm oda a gemeinsåme Wöidånschauung. S'Züi vo ana Partei is, daß s'politische Entscheidungen bestimmt oda zumindestns beeinflusst; zu dem Zweck vasuacht's, daß s'bei Wåinmöglichst vüi Stimmen griagt, damid s'dånn wichtige politische Ämta besétzn kã.
Politische Partein ghern zu de Eîrichtungen im politischn System, de wås zwischn am Stååd und de Bürga vamittln. Af da àn Seitn san s'dazua då, daß de Leid im Parlament und in da Regierung béssa kontrollierd wern: Wånn jétz ana néd de Politik måcht, de wås de Partei vor da Wåi vasprochn håd, kã eam d'Partei nächsts Måi nimma afstöin. Und wånn de gånze Partei nimma dés måcht, wås s'vasprochn håd, kã da Bürga nächsts Måi a åndane Partei wöin.
Af da åndan Seitn håm s'åwa à a umkehrde Funkzion: Partein sorng nämli durch eanane Vaånståitungen und Werbung dafir, daß de Politik, de wås s'in eanane gwöidn Ämta måchn, bei de Parteimitgliada und drüwa hinaus à bei de åndan Leid akzeptierd wird. Wånn jétz de Parteimitgliada oda d'Leid insgesåmt woin, daß a bestimmtes Problem in da Politik behåndlt wird, kinnan s'dés Intaresse afgreifn und eana Politik drauf åstimma. Im Géngsåtz zu Intaressnsvadretungen miaßn Partein dabei schaun, daß s'möglichst vüi Leid mid eanane Inhåite ãspréchn.
0 Comments
